Ильмир Әхмәтҗәнов: «Минем хыялым балаларны иманлы, итәгатьле, татар җанлы итеп тәрбияләү»
«Реальное время» продолжает говорить по-татарски: авторская колонка татарина о жизни в Северной Америке
Интервью с уроженцем Башкирии Ильмиром Ахметзяновым, чья блинная на колесах попала в пятерку лучших точек фастфуда в Питтсбурге, не осталось незамеченным читателями «Реального времени». Ильмир в колонке, специально написанной для нашей газеты, делится своим мыслями и надеждами о татарской общине в США.
«Бер елны хәтта унөч бала туды»
Мин — Ильмир Әхмәтҗәнов, Америка кушма штатларытатарларының активисты. Пенсельвания штатының Питсбург шәһәрендә яшим. Гаиләм бар, ике бала үстерәбез. Аллага шөкер. Шәһәребезнең кечкенә үз мәхәлләсе бар. 25-30га якын кеше, 4-5 гаилә бик якын аралашып торабыз.
Соңгы арада Америкада татарлар активлашты, үз оешмаларын булдырды. Мәсәлән, Нью-Йоркта, Вашингтонда, Флорида да татар оешмалары бар. Сан-Францискода электән үк татар оешмасы эшләп килә. Алар бар да аралашып, танышып торалар. Канаданың Монреаль шәһәрендә дә актив татарлар бар. Татарлар бер берсен табып, аралашып яшиләр.
Вашингтонда, Нью-Йоркта, Монреальда зур татар чаралары уза. Аларның оештыручылары, әйдәп торучылары бар. Бергәләп төрле чаралар оештырабыз. Сабантуе, Корбан бәйрәмнәре гөрләп уза. Мин әлеге бәйрәмнәрне алып барам, мәдәни программаларны оештырырга ярдәм итәм.
Әлеге бәйрәмнәрнең уңышлы нәтиҗәләре дә бар: көз башында гына ничә татар гаиләләре туды, бер елны хәтта унөч бала туды әлеге чаралар ярдәмендә оешкан гаиләләрдә.
«Америкада җитди эшкуарлар да бар»
Мондагы татарлар бер-берләрен табып аралашырга тырыша, бу шатландыра. Безнең халык арасында төрле һөнәр ияләре бар: хокук белгечләре, табиблар, яңа үз эшләрен башлап җибәрүчеләр, җитди эшкуарлар да бар, IT технологиярдә эшләүчеләр. Укырга килүче студентлар да күп. Башкортстаннан да, Татарстаннан да бар алар. Арабызда динне танып, намаз укыган кешеләребез дә бар. Конгрессмен булган, сәясәттә булган татарларны әле ишеткәнем юк. Әмма киләчәктә бу булыр дип уйлыйм, чөнки арабызда укыган кешеләр бар, АКШ та югары уку йортларын тәмамлаучылар бар.
Борчыган проблемаларның берсе ул туган телне өйрәнү. Әлбәттә, без – әти-әниләр балалар белән өйдә татарча аралашабыз. Әмма дәүләт – ул зур машина. Балалар балалар бакчасына бара, мәктәпкә китә. Ә анда барысы да инглиз телендә. Әмма әти-әниләр тырышалар. Татарча да, русча да, төрекчә дә, инглизчә дә белгән, әлеге телләрдә сөйләшкән гаиләләр бар. Алар үз тәҗрибәләре белән уртаклаша.
Минем хыялым бабаларны иманлы, итәгатьле, татар җанлы итеп тәрбияләү. Тагын бер хыялым бар – Питсбургны АКШ татарларының мәркәзе дип күрергә телим.Киләчәктә үз биналарыбыз булса иде. Яңа килгән эмиграция вәкилләрен Питсбургка җәлеп итәсе иде. Аларны эшкә урнаштырып, ярдәм итеп яшисе, шул рольне үтисе килә. Балалар бакчалары ачып, шимбә анда балаларга татар теле укытып, зур бер гаилә булып яшисе килә киләчәктә. Бүгенге көндә мин моңа бик күп көч салам.
«Мин кайда булсам да, кайда йөрсәм дә милләтем дип яшәячәкмен»
Безнең якташлар бик тырыш кешеләр, кайда эшләсәләр дә алар алдынгы булырга тырыша. Узышып, алдынгылыкка омтылган халык.Кайда гына хезмәт итсен, аларның ниндидер казанышы бар. Киләчәктә татарлыкны үстереп, матур итеп яшәрбез дип уйлыйм.
Әлегә без бәйрәмнәр генә оештырабыз. Әмма әлеге бәйрәмнәр мәхәлләләребезне булдырырга бер зур этәргеч булыр дип уйлыйм. Татар тормышына битараф булмаган, актив яшьләрне җәлеп итәргә кирәклеген аңлыйм. Киләчәктә бердәмлекне сизәсе, тоясы килә. Җырлап, биеп кенә түгел, ниндидер каршылык була калса, бердәм җавап бирерлек көчле җәмәгатьчелек булуын теләп калам.
Әлеге мәкаләне үз хәҗәтләрен генә үтәп яшәгән Америка татарлары укып, күреп, безнең белән бәйләнешкә чыксын, безгә тартылсын иде. Америкага килүчеләр булса, мин һәрвакыт Питсбургка чакырам, ярдәм итәргә, киңәш бирергә әзермен.
Мин кайда булсам да, кайда йөрсәм дә милләтем дип яшәячәкмен, милләтпәрвәрмен. Халкымны һәрвакыт данлап йөриячәкмен, үз халкым өчен һәрвакыт җан атып яшәячәкмен.